Psa 22 | NdeIBE | STEP | Kumqondisi wokuhlabela. Kulandela itshuni ethi, “Impalakazi yekuSeni.” Ihubo likaDavida. Nkulunkulu wami, Nkulunkulu wami, kungani usungidelile na? Kungani ukhatshana kangaka kokungisindisa, khatshana kangaka kwamazwi okububula kwami?

Psalms 22

1 Nkulunkulu wami, Nkulunkulu wami, kungani usungidelile na? Kungani ukhatshana kangaka kokungisindisa, khatshana kangaka kwamazwi okububula kwami?

2 Hawu Nkulunkulu wami, ngiyakhala emini, kodwa kawuphenduli; ebusuku, kangithulanga.

3 Kanti usesihlalweni sobukhosi unguye oNgcwele; uyindumiso ka-Israyeli.

4 Obaba babeka ithemba labo kuwe; bona bathemba wena wabakhulula.

5 Bakhala kuwe bakhululwa; bathemba kuwe kabaze badaniswa.

6 Kodwa ngiyimpethu nje kangisumuntu, ngihozwa ngabantu njalo abanengi bangeyise.

7 Bonke abangibonayo bayangihleka; bayangithuka baze banikine amakhanda:

8 “Uthemba uJehova; uJehova lowo kamkhulule. Kamsindise njengoba ethokoza ngaye.”

9 Kanti wena wangikhupha esiswini; wangenza ngakuthemba kusukela ebeleni likamama.

10 Kusukela ekuzalweni kwami ngabekwa ezandleni zakho; kusukela esiswini sikamama ulokhu unguNkulunkulu wami.

11 Ungabi khatshana kwami, ngoba uhlupho luseduze njalo kakho ongangisiza.

12 Izinkunzi ezinengi zingihanqile; izinkunzi ezilamandla zaseBhashani zingihonqolozele.

13 Izilwane ezibhongayo ezibamba zidabudabule zingikhamisela imilomo yazo.

14 Ngiyathululeka njengamanzi, njalo amathambo ami wonke akhumukile. Inhliziyo yami isiphenduke yaba yingcino; isincibilikile ngaphakathi kwami.

15 Amandla ami asetshile qhu ingathi ludengezi, lolimi lwami luyanamathela olwangeni lwami; uyangilalisa othulini lokufa.

16 Izinja sezingihanqile; ixuku labantu ababi selingihonqolozele, sebengigwaze izandla lezinyawo.

17 Ngingawabala wonke amathambo ami; abantu bayanginyonkoloza bangiklolodele.

18 Behlukaniselana izambatho zami njalo benze inkatho ngezigqoko zami.

19 Kodwa wena, O Jehova, ungabi kude; Hawu Mandla ami, woza masinyane uzongisiza.

20 Phephisa impilo yami enkembeni, impilo yami eligugu emandleni azo izinja.

21 Ngilamulela emlonyeni wezilwane; ngisindisa ezimpondweni zezinyathi.

22 Ngizamemezela ibizo lakho kubafowethu; emphakathini ngizakudumisa.

23 Lina elimesabayo uJehova, mdumiseni! Lani lina zizukulwane zikaJakhobe, mbabazeni! Mhlonipheni, lina lonke zizukulwane zika-Israyeli!

24 Ngokuba keyisanga loba adelele ukuhlupheka kwalowo ohlukuluzwayo; kamfihlelanga ubuso bakhe kodwa walalela ukukhala kwakhe ecela ukusizwa.

25 Sivela kuwe isithathelo sokudumisa kwami emhlanganweni omkhulu; Ngizagcwalisa izifungo zami phambi kwalabo abakwesabayo.

26 Abayanga bazakudla basuthe; labo abamdingayo uJehova bazamdumisa – sengathi izinhliziyo zenu zingaphila nini lanini!

27 Yonke imikhawulo yomhlaba izakhumbula iphendukele kuJehova, njalo lezimuli zonke zezizwe zizakhothama phansi phambi kwakhe,

28 ngokuba umbuso ungokaJehova njalo uyabusa phezu kwezizwe.

29 Zonke izinothi zomhlaba zizakudla amadili njalo zikhonze; bonke abangena othulini bazaguqa phambi kwakhe labo abangeke baziphilise.

30 Abesikhathi esizayo bazamkhonza; izizukulwane zizakwaziswa ngoJehova.

31 Bazatshumayela ukulunga kwakhe ebantwini abangakazalwa – ngokuba ukwenzile yena.